DIARIO DE GRAVACIÓN_día_11

DIARIO DE GRAVACIÓN.
Día 11. Quinta feira 11 de decembro.

Na quinta acabamos as sesións de gravación do disco.

Dende as 11.00 ata as 19.00, con lóxico parón para meternos unha pequena churrascada que non impedira cantar despois, Iago e Vituco andiveron a darlle os derradeiros retoques a unhas voces que quedaron ben bonitiñas.

As cancións deste disco precisaban matices un tanto diferentes ó feito polos ruxe ata o de agora e houbo que tomar a gravación de voces con certa calma e buscando o punto xusto en cada canción. Pensamos que  quedaron moi pero que moi ben poñéndolle ó disco a guinda final. E por certo., que chulas son as letras deste traballo. Xa veredes. 🙂

Ademais onte tivemos a visita de Paino e de Tomás Ageitos que viñeron a saudarnos a Pousada e despois no churrasco cadramos con eles e con Chus Silva, que foi técnico noso durante un tempo, co que tivemos un momento de xantar ben curioso e divertido.

Agora si …

comezamos as mesturas … nuns días contámosvos máis e tamén comunicaremos a data de saída do disco e a data de presentación.

O 2015 promete 🙂

apertazas ghrandes xente !!! 

DIARIO DE GRAVACIÓN_día_10

DIARIO DE GRAVACIÓN.
Día 10. Martes 9 de decembro.

Pois si, xa estamos chegando ó final da gravación. Este martes gravamos os coros. Sesión de tarde con Miguel, Carlos, Xan, e Sevi diante do micro e con Iago e Vituco detrás da mesa. 14 cancións son moitas e aínda dan de si para botarlle unhas boas berradas así que cundiu un montón a sesión de coros.

A gravación dos coros nos discos de ruxe sempre é momento de leria, de moitas risas e de ambiente festeiro. Catro tipos ouveando á vez ten o seu aquel de divertimento e hoxe abofé que foi así ó longo das case que catro horas que estivemos en Pousada.

E quedaron moi pero que moi ben e dánlle ás cancións moita enerxía e moi bo rollo e ademais andiveron afinadiños así que todo de luxo.

Vamos, que tarde de disfrute total.

E agora xa toca ir rematando gravación e será entre hoxe e mañán con Vituco repasando algunhas das cantadas e afianzando uns temas que aínda non estaban totalmente niquelados.

E con iso gravación rematada. 🙂

Despois a comezar as misturas …

Mañán xa vos seguimos contando !!!

apertas ghrandes queridinh@s !!

DIARIO DE GRAVACIÓN_día_9

DIARIO DE GRAVACIÓN.
Día 9. Luns 8 de decembro.

Neste día 9 de gravación adicámonos a rematar as guitarras. Levounos a mañán e así a tarde deixámola libre que boa falta facía un pouco de descanso para os ouvidos. 

Miguel fixo arranxos a esgalla e algún solo e as cancións quedaron fantásticamente vestidas de guitarras. Tocáronse xa co son definitivo que van levar no disco. Practicamente todo co Bogner e algo cun Orange. E todas coas Les Paul Classic a Les Paul Custom e unha Fender Telecaster vella. Xa vos dixemos que a idea é a de acadar un son moi directo e con pouco artificio. A verdade é que as guitarras quedaron moi pero que moi ben e xa fan que a grvavación comece a soar a disco.

Resumindo: excelente traballo de guitarras 🙂

Hoxe martes faremos os coros e daremos por rematado o traballo de gravación para comezar coas mesturas. Aínda que probablemente faremos algunha sesión a maiores para regravar algunha cousa que vexamos que é mellorable ou algo que botemos en falta.

Continuamos e cada vez máis ilusionados vendo o resultado.

O novo dos ruxe está ó caer 🙂

apertas amighiñ@s !!!

DIARIO DE GRAVACIÓN_DÍA_8

DIARIO DE GRAVACIÓN.
Día 8. Domingo 7 de decembro.

O domingo so gravamos pola mañán e deixamos a tarde libre por aquelo de que a familia nos vexa e teña constancia de que estamos vivos aparte de sabelo por ler este diario. 🙂

Daquela de 10.00 a 13.30 Miguel fixo ruxir guitarras en Pousada.

As guitarras deste disco son punkeiras e un pouco menos densas que as do Némesis. Estas novas cancións piden guitarras sachadoras e que respiren ben dando profundidade e agarre pero cun son máis clásico ou vintage que dirían os modernos.

Miguel está facendo un traballazo e está poñendo a guinda a unha gravación na que o grupo deu de sí máis que en ningún outro disco. E tamén, e quizais debido ó carácter que dá unha gravación condensada en tan pouco tempo, todas as cancións estan collendo o punto do momento e eso mola un montón. –Vivimos neste instante. Estamos aquí e agora. Este é o momento de facelo e facémolo-.  Fetén. 🙂

O caso é que Miguel acabou este domingo as guitarras rítmicas e mañán luns dende ben cedo pola mañán tocan arranxos, solos, melodías e o que faga falta.

Daquela xa vos contaremos mañán como nos foi.

Saúde e terra !!!

ah !! e grazas por lernos !!

bicos !!

DIARIO DE GRAVACIÓN_DÍA_7

DIARIO DE GRAVACIÓN.
Día 7. Sábado, 6 de decembro.

Pois así como non quere a cousa estamos xa chegando ó tramo final da gravación do disco.

O sábado ás 10.00 h arrancamos coas guitarras. Miguel fixo na mañán case a metade das rítmicas poñendo a soar o Bogner coma unha máquina de mallar. Gravou de momento con dúas Les Paul e mañán vaille tocar o turno a unha Telecaster e a un par de bichos máis que temos por alí. De momento hoxe foi toma de contacto para ir quencendo para xa mañán centrar toda a gravación en guitarrear.

E pola tarde viñeron os nosos invitados de luxo para colaborar neste disco. Dous metais de Biribirlocke. Martín e Roberto, saxo e trompeta, que fixeron trío de metais co Xan e deixaron unhas cantas cancións do disco cuns arranxos caralludos. Mirade que son bos os metais dos Biribirlocke e dende que tocaron con nós na presentación do Némesis xa tiñamos ganas de metelos a gravar con nós. Rapaces e músicos espectaculares. Ademais tamén andivo polo estudio de apoio moral Héctor, o bateria dos Biribirlocke. 

Tamén nos molou que por primeira vez na gravación cadramos os seis ruxes xuntos no estudio que ata o de agora por horarios de uns e outros non puidera ser. E Jairo todo o día con nós gravando e gravamdo material para ese documental que está a facer sobre ruxe. Molou moito este sábado. 🙂

E mañán guitarras e máis guitarras e máis guitarras con Miguel de capitán.

Xa vos contamos.

Veña que estamos na recta final.

Bicos para todas e todos.

DIARIO DE GRAVACIÓN_día_6

DIARIO DE GRAVACIÓN.
Día 6. Sexta feira, 5 de decembro.

Alá foi o sexto día de gravación e xa case rematando. Onte ó igual que antonte traballamos nas voces do disco e xa case case que as temos rematadas. Faltan os coros e algunha carallada máis que se nos acorde polo camiño.

Neste disco a verdade é que chegamos coas cancións bastante claras pero tamén coa idea de poder mudar cousas no estudio segundo nolo pedira o corpo e nesas andamos.

Outra cousa que rematamos onte foron as gaitas. Niqueladas, afinadiñas e cunhas melodías que xa veredes. De novo o master Tomás Ageitos estivo tripulando a nave de Xaco e entre os dous fixeron un traballo excelente. Agora Iago terá que traballar na mestura pero a materia prima é de primeira.

E onte tamén foi un día importante para a gravación do documental. Jairo andivo de novo toda a xornada coa cámara atento á nosa maneira de traballar e preguntándonos un montón de cousas que seica despois irá montando de cara ó resultado final. Está sendo unha experiencia eso de ter a Jairo coa cámara prendida a todas horas ó noso carón pero a verdade é que estamos comezando a collerlle o punto e sobre todo tendo en conta que Jairo xa é un máis dentro do estudio e do funionamento do grupo 🙂

Foi un día moi bonito e continuamos disfrutando moito do proceso e máis aínda co quentiños que estamos dentro do estudio e vendo o frío que fai fóra. Vituco e Xan aínda non sacaron a gorra da cachola nin un minuto de gravación.  🙂

Continuamos hoxe con guitarras. Tócalle o turno a Miguel.

A guitarrear !!!

Continuamos contándovos mañán !!

apertas ghrandes amighiñ@s e que teñades unha boa finde !!!